Barnshafandi kona var föst í bíl á Oddskarði

Björgunarsveitirnar Gerpir frá Neskaupsstað og Brimrún frá Eskifirði voru kallaðar út um klukkan 4:30 í nótt vegna konu sem sat föst í bíl á Oddskarði, Eskifjarðarmegin, en hún var á leið á sjúkrahús til að fæða barn. Í tilkynningu frá Landsbjörgu segir að björgunarsveitarbíll frá Eskifirði með lækni innanborðs hafi verið sendur af stað og var hann kominn að bíl konunnar um klukkustund síðar og var ekið með hana áleiðis til Neskaupsstaðar. Eftir þónokkra svaðilför fæddist lítil stúlka á Fjórðungssjúkrahúsinu í Neskaupsstað.

„Við Háhlíðarhorn mætti björgunarsveitin Gerpir þeim með tvo björgunarsveitabíla, sem í voru læknir og ljósmóðir, snjóplóg og snjótroðara frá skíðasvæðinu á Neskaupsstað," segir ennfremur og þess getið að færð hafi verið afar slæm. „Var snjótroðarinn nýttur til að troða svæði í kringum veginn þannig að hægt væri að snúa bílunum við. Snjóplógurinn sat fastur og þurfti að nýta troðarann til að losa hann. Veður var afleitt en vindhraði var um 48 m/sek og allar aðstæður mjög erfiðar."

Í Oddskarðsgöngum var konan færð yfir í bíl frá Gerpi og ekið með hana á Fjórðungssjúkrahúsið í Neskaupsstað þangað sem hún var komin klukkan 7:15 í morgun. „Var þá afar stutt milli hríða en lítil stúlka fæddist svo klukkan 8:15 í morgun og heilsast þeim mæðgum vel.

Svaðilför björgunarsveitarmanna var þó ekki lokið því eftir að fyrri björgunarsveitabíllinn fór af stað með konuna til byggða tók við tómt basl hjá Gerpismönnum þegar jeppinn affelgaðist.

„Þar sem veðrið var kolvitlaust var ákveðið að senda fyrri bílinn aftur á Oddskarðið með varadekk í stað þess að freista þess að koma dekkinu á felguna aftur. Er því verki nýlega lokið og hefur gengið á ýmsu, m.a. hefur jeppinn fokið af tjakknum tvívegis. Að lokum var snjótroðarinn notaður til að skýla jeppanum og halda honum föstum með spilinu á meðan skipt var um dekkið," segir í tilkynningunni. Björgunarsveitin mun þegar þetta er skrifað vera á leið til byggða.