Mat á Icesave-ábyrgð kannski of bjartsýnt

Mat skilanefndar Landsbankans á því hve stór hluti Ice­save-skuldbindinganna mun lenda á íslensku þjóðinni er „háð gríðarlegri óvissu“ segir Steingrímur J. Sigfússon fjármálaráðherra. „Og það er rétt að upplýsa að það eru ekki allir aðilar jafnbjartsýnir á þetta mat eins og skilanefnd Landsbankans,“ segir hann.

Skilanefndarmenn hafa sagt að vonir þeirra standi til að um 72 milljarðar standi eftir af skuldbindingunum þegar eignir hafa verið seldar að nokkrum árum liðnum.

Tekist var á um Icesave-málið á þingi í gær. Siv Friðleifsdóttir, þingmaður Framsóknarflokksins, hóf utandagskrárumræður um málið, sem hún kallaði „eitthvert mesta óréttlætismál síðari tíma“.

Sjálfstæðismennirnir Sigurður Kári Kristjánsson og Pétur Blöndal gagnrýndu stjórnarliða fyrir lausatök í málinu, ekki hafi verið leitað til reyndustu sérfræðinga til að semja um málið við kröfuhafa fyrir Íslands hönd og að svo virtist sem Íslendingar ætluðu einfaldlega að gleypa við þeim kröfum þeim yrðu settar.

Stjórnarliðar, ásamt Siv, gagnrýndu sjálfstæðismenn aftur fyrir það sem þeir kölluðu sinnaskipti flokksins í málinu. Flokksmenn hefðu greitt því atkvæði fyrr á árinu að Íslendingar skyldu standa við sínar skuldbindingar og því væri einkennilegt að heyra þá efast um það nú.

Þá spurði Siv Steingrím hvort eitthvað ræki á eftir því að niðurstaða fengist fljótt í málið. „Ég held að það sé okkur í hag að vera ekki að ná niðurstöðu of hratt af því að eftir því sem tíminn líður þá held ég að Bretar hljóti að skynja stöðu mála hér og sýna okkur meiri skilning með vaxtakjör og annað.“

Steingrímur svaraði því til að vissulega væri lögð áhersla af hálfu samningsaðila okkar á að málinu yrði hraðað sem mest. Gert hafi verið ráð fyrir að samningaviðræðum lyki á næsta hálfa ári.

stigur@frettabladid.is