Segir sjóræningja halda tólf ára stúlku

Spænskur skipstjóri, sem sómalskir sjóræningjar slepptu nýlega úr haldi, segist vita til þess að tólf ára gömul úkraínsk stúlka sé í haldi sjóræningjanna.

Ricardo Blach er skipstjóri spænska túnfiskveiðiskipsins Alakrana en áhöfn þess var í haldi sómalskra sjóræningja í sex vikur. Áhöfnin fékk frelsið á þriðjudaginn í síðustu viku og segir Blach frá því í viðtali við spænska blaðið El Mundo að meðal þeirra sem sjóræningjarnir hafi í haldi sé tólf ára stúlka frá Úkraínu. Hún sé dóttir manns sem tilheyri áhöfn úkraínska flutningaskipsins Ariana en sjóræningjarnir hafa haft skipið og áhöfnina í haldi í hálft ár.

Blach segist hafa komist á snoðir um þetta þegar hann fór um borð í skipið til að lána áhöfn þess eldsneyti og lyf. Hann segir að móðir stúlkunnar sé einnig um borð í skipinu og hafi hún grátbeðið Blach um að taka dótturina með sér þegar hann fékk frelsið. Þetta segir Blach sjóræningjana ekki hafa heimilað en tólf sjóræningjar hafi verið um borð í Ariana. Hins vegar hafi 30 sjóræningjar verið á hans skipi sem var rænt 2. október.

Fjölskyldur áhafnar úkraínska skipsins sendu í síðasta mánuði frá sér orðsendingu til sjóræningjanna og útgerðar skipsins og báðu um að samningaviðræðum um lausnargjald yrði flýtt en skipið hefur verið á valdi ræningjanna síðan 2. maí.