Fundu fíkniefni í Grafarholti

Fíkniefni fundust við húsleit í íbúð í Grafarholti eftir hádegi í gær. Um var að ræða um 1,5 kíló af hassi, ríflega 600 grömm af marijúana og kókaín í neysluskömmtum. Að sögn lögreglu voru tveir menn á þrítugsaldri handteknir og yfirheyrðir í tengslum við rannsókn málsins.

Þeir munu áður hafa komið við sögu hjá lögreglu en húsleitin var framkvæmd að undangengnum dómsúrskurði.

Í tilkynningu frá lögreglu segir ennfremur að fyrrnefnd aðgerð sé liður í að hamla gegn sölu og dreifingu fíkniefna en sem fyrr minnir lögreglan á fíkniefnasímann 800-5005. „Í hann má hringja nafnlaust til að koma á framfæri upplýsingum um fíkniefnamál. Fíkniefnasíminn er samvinnuverkefni lögreglu og tollyfirvalda og er liður í baráttunni við fíkniefnavandann."