Bandarísk lögregla prófar höfuðmyndavélar

Lögregla í Kaliforníu hefur nú til reynslu nýja myndavélatækni sem ætlað er að vera til vitnis um allar aðgerðir hvers lögreglumanns.

Ítrekaðar ásakanir um ofbeldi og hrottaskap lögreglu í Kaliforníu og reyndar víða urðu kveikjan að tilraun til að mynda atburðarás allra mála sem hver lögreglumaður kemur að. Tæknin byggist á örsmárri myndavél sem svipar til heyrnartóls Bluetooth-farsíma en það er fest við eyra notandans.

Átján lögreglumenn bera myndavélarnar nú til reynslu og er gert ráð fyrir að kveikt sé á myndavélinni í hvert sinn sem lögregla hefur afskipti af borgurunum. Þeim myndskeiðum, sem orðið hafa til á hverri vakt, er svo hlaðið niður á harðan disk eftir vaktina og þau geymd í ákveðinn tíma þurfi að grípa til þeirra til sönnunarfærslu í dómsmáli eða vegna annarra rannsóknarhagsmuna.

Það er lögreglan í San Jose sem ríður á vaðið við prófun myndavélanna en það er fyrirtækið Taser International í Arizona, hið sama og framleiðir stuðbyssur fyrir lögregluna, sem framleiðir vélarnar og greiðir fyrir tilraunatímabilið en hver myndavél kostar rúmar 200.000 krónur og þjónustugjald fyrir hvern mánuð er yfir 12.000 krónur.