Með barn á brjósti í kosningaslag

Sigríður Ásthildur Andersen, sem sækist eftir einu af fjórum efstu sætunum á lista Sjálfstæðisflokksins í Reykjavík, eignaðist sitt annað barn fyrir viku og það í miðri kosningabaráttu.

Vísir hafði samband við Sigríði til að kanna hvort hún treysti sér í slaginn og hvernig fæðingin gekk.

„Fæðingin gekk voða vel, þó mun hraðar en ég bjóst við, svona express útgáfa af fæðingu eldri dóttur okkar. Við hjónin eigum eina dóttur fyrir, þriggja og hálfs árs, sem tekur litlu systur sinni afar vel," svarar Sigríður.

Ertu með kraftaverkið á brjósti og ertu vel frísk og til í slaginn?

„Já, það er allt komið á fulla ferð hér í fjósinu. Það þarf nokkra tækni við þetta."

„En það eru nú að rifjast upp fyrir mér gamlir taktar frá því fyrir þremur árum," svarar Sigríður.

„Við erum svo heppin að eiga ömmur og afa sem hjálpa okkur mikið, sérstaklega með stóru systur. Þau skutla og sækja stundum í leikskólann," segir Sigríður.

„Annars hafa fjölskyldur okkar, sem og nánustu vinir, verið afar hjálplegar lika í prófkjörsbaráttunni. Það eru allir venslaðir manni virkjaðir í pólitíska slaginn."

„Ætli þetta blessaða fólk sé ekki manna fegnast því að þessum slag er nú að ljúka, - og bíður nú eftir næsa stormi," segir nýbökuð mamman að lokum.