Smyglaði 200 tonnum af kókaíni

Mexíkóskur kókaínbarón hefur verið dæmdur í 27 ára fangelsi í Bandaríkjunum fyrir að smygla að minnsta kosti 200 tonnum af kókaíni frá Mexíkó til Bandaríkjanna.

Gilberto Salinas Doria kvaðst sekur um ákæruatriðin þegar dómari í New York bað hann að taka afstöðu til þess hvort hann hefði smyglað allt að 200 tonnum af kókaíni inn í Bandaríkin á árunum 1994 til 1999. Þessi játning átti sér stað í desember í fyrra eftir að mexíkósk yfirvöld höfðu framselt Doria til Bandaríkjanna en hann er einn af þungavigtarmönnunum í hinum svokallaða Juarez-eiturlyfjahring sem gerir út frá mexíkósku borginni Ciudad Juarez.

Doria stjórnaði flutningi kókaínsins frá Reynosa í Mexíkó yfir til Texas og hafði til þess fjölda manns í vinnu. Frá Texas streymdi kókaínið svo á markaði í Los Angeles, New York og fleiri bandarískum borgum. Sömu aðilar smygluðu svo bílförmum af dollurum og skotvopnum til baka til Mexíkó þar sem Juarez-hringurinn beið fengsins. Það var svo núna í byrjun vikunnar sem Doria hlaut 27 ára fangelsisdóm fyrir smyglið og mun afplána hann í bandarísku fangelsi.

Forsetar Bandaríkjanna og Mexíkó, Barack Obama og Felipe Calderon, hafa tekið höndum saman í baráttunni við mexíkóska eiturlyfjahringi en rúmlega 15.000 manns hafa fallið í átökum tengdum fíkniefnamarkaðinum í Mexíkó síðan árið 2006.