Oddvitar L-lista í Suðurkjördæmi og Reykjavík suður

Már Wolfgang Mixa leiðir framboð L-lista fullveldissinna í Reykjavíkurkjördæmi suður og Kristbjörg Steinunn Gísladóttir í Suðurkjördæmi. Fyrir skömmu var tilkynnt að Bjarni Harðarson, fyrrverandi þingmaður, leiði lista framboðsins í Reykjavíkurkjördæmi norður.

Már Wolfgang

Fram kemur í tilkynningu að Már hefurvíðtæka reynslu í fjármálum en hann hefur starfað í meira en áratug við innlendar og erlendar fjármálastofnanir. Meðal starfa sem hann hefur gegnt eru framkvæmdastjóri, forstöðumaður verðbréfasviðs, sjóðsstjóri, eigin viðskipti, millibankaviðskipti, uppsetningu verðbréfa- og lífeyrissjóða og samskipti við alþjóðlega aðila.

Á þessu ári klárar Már meistaranám í Fjármálum við Háskóla Íslands. Már hefur áður lokið BS námi í fjármálafræði og BA námi í heimsspeki við University of Arizona. Hann hefur einnig hlotið löggildingu sem verðbréfamiðlari hér á landi og í Bandaríkjunum.

Már fæddist í Reykjavík 6. febrúar, 1965 og hefur búið í Hafnarfirði síðastliðin ár. Hann er giftur Kristínu Loftsdóttur, prófessor í mannfræði. Þau eiga 3 börn.

Kristbjörg Steinunn

Kristbjör hefur unnið m.a. í fiski og á skrifstofu hjá Hraðfrystihúsinu Hofsósi. Flutti suður á Flúðir 1991, meðan hún bjó þar vann hún m.a. á skrifstofunni hjá Límtré verksmiðjunni í 9 ár. Árið 2001 flutti Kristbjörg til Selfoss þar sem hún býr enn. Vorið 2005 hóf hún störf sem áfengis- og vímuefnaráðgjafi á Teigi LSH þar til hún flutti sig um set í nóvember 2006 til Krýsuvíkur þar sem hún starfar einnig sem áfengis- og vímuefnaráðgjafi.

Kristbjörg fæddist á Hofsósi í Skagafirði 11. október 1963 og er uppalin þar Hún er gift Bjarna Ragnarssyni búfræðingi og eiga þau saman tvo syni og fyrir átti Bjarni dóttir. Kristbjörg lauk námi í Ritaraskólanum Mími árið 1989 og námi í Ráðgjafaskóla Íslands árið 2004.