Minnt á rétta meðferð flugelda

Lögreglan minnir á nokkur atriði úr reglugerð um skotelda í ljósi þess að áramót eru framundan. Í reglugerðinni segir meðal annars að á því tímabili sem almenn notkun skotelda er leyfð, 28. desember til 6. janúar, er meðferð þeirra þó alltaf bönnuð frá miðnætti til kl. 09:00 að undanskilinni nýársnótt.

Þá er einnig minnt á að óheimilt sé að breyta á nokkurn hátt skoteldi þannig að hann hljóti aðra eiginleika en framleiðandi hans ætlaðist til og við meðferð og vörslu skotelda skal ítrustu varúðar gætt og ætíð farið eftir skráðum leiðbeiningum.

„Við brennu og í næsta nágrenni við hana er öll meðferð flugelda og annarra skotelda sem hætta stafar af vegna ferils þeirra eftir tendrun bönnuð. Þar er aðeins leyfilegt að nota stjörnuljós og blys, þó ekki skotblys," segir ennfremur og að lokum eru allir hvattir til þess að nota þar til gerð hlífðargleraugu þegar flugeldar eru annars vegar.