Kysstust í mótmælaskyni

Rússneskt lesbíupar kysstist fyrir utan dómsal í Moskvu í mótmælaskyni eftir að fyrirtöku máls sem þær höfðuðu á hendur ríkinu var frestað.

Konurnar höfðuðu mál á hendur ríkinu þar sem þeim er meinað að ganga í hjónaband. Dómarinn ákvað hins vegar að fresta fyrirtöku málsins vegna fjarveru þeirra. Þær mættu í dómsal 10 mínútum síðar.

Lögmaður kvennanna mótmælti vinnubrögðum dómarans harkalega og kallaði þau hneyksli. Fjöldi fjölmiðla var á staðnum og féllust konurnar í faðma fyrir framan myndavélarnar og kysstust fyrir utan dómsalinn í mótmælaskyni.-bs