Tugmilljóna skemmdir á fráveitunni

„Slæm umgengni notenda fráveitu hefur valdið tugmilljóna tjóni,“ segir heilbrigðis-fulltrúi Suðurlands í bréfi til skipulags- og byggingarnefndar Ölfuss.

„Ástæðan fyrir þessu er að sumir notendur virðast fjarlægja ristar og mengunarvarnir í fyrirtækjum sínum og spúla öllu beint í fráveituna í stað þess að hreinsa gólf af aðskotahlutum áður en þrif fara fram,“ segir í fundargerð skipulagsnefndarinnar þar sem vitnað er til bréfs heilbrigðis-fulltrúans sem ræðir um aðfarir vinnslufyrirtækja í Þorlákshöfn.

„Föstum efnum skal skila aftur til vinnslu eftir því sem kostur er þannig að grófur óuppleystur úrgangur berist ekki í fráveitu og fráveita fyrirtækisins skal útbúin með fitugildru,“ vísar heilbrigðis-fulltrúinn til starfsleyfisskilyrða. „Fitu og úrgang sem safnast í fitugildru eða á ristar skal nýta eftir því sem kostur er t.d til bræðslu eða mjölvinnslu, en að öðrum kosti farga á viðurkenndan hátt.“

Skipulagsnefndin fyrir sitt leyti áréttar við forráðamenn vinnslufyrirtækjanna að hafi þeir ekki komið upp fitugildrum við fyrirtæki sín geri þeir það strax „enda allir frestir sem veittir hafa verið löngu liðnir“. - gar