Olíuleit skapar störf norðaustanlands

Íbúum sveitarfélagsins Fjell á eyju utan við Bergen fjölgaði úr sjöþúsund í yfir tuttugu þúsund á þeim árum sem höfnin við Ågotnes byggðist upp, ein af mörgum þjónustuhöfnum Noregs við olíuiðnaðinn. Á hafnarsvæðinu starfa þrettánhundruð manns í 65 fyrirtækjum. Borpallar koma reglulega inn til viðhalds, skip eru í stöðugum ferðum með rör, efni og vistir til olíusvæðanna og flutningabílar streyma að með allskyns varning.

Hefjist olíuvinnsla á Drekasvæðinu sjá menn fyrir sér að höfn sem þessi byggist upp í Gunnólfsvík við Langanes, en fyrstu árin, meðan olíuleit stendur yfir, verði hafnirnar á Vopnafirði og Þórshöfn nýttar til að þjónusta leitarpalla. Hafsteinn Ágústsson, olíuverkfræðingur í Bergen, segir að einnig þurfi flugvöll á svæðinu sem geti tekið á móti stórum vöruflutningavélum. Við þetta geti skapast töluverð atvinna og gróska fyrir þetta svæði.

Sola-flugvöllur við Stavanger er helsta þyrlumiðstöð olíusvæða Noregs en á Íslandi sjá menn Egilsstaðaflugvöll fá slíkt hlutverk og þar þurfi fljótlega að reisa þyrluskýli. Nils-Rune Kolnes, yfirflugstjóri CHC Helicopter í Stavanger, segir að einn borpallur kalli á lágmark tvær þyrlur en að jafnframt yrði væntanlega gerð krafa um að björgunarþyrla væri til reiðu allan sólarhringinn. Þessi starfsemi geti þýtt 40-50 störf.

Íslendingar gætu sjálfir annast alla þyrlu- og björgunarþjónustu og tekið Færeyinga sér til fyrirmyndar sem leyfa ekki starfsemi erlendra þyrlufélaga.