Björgunarskip sigldi stjórnlaust af stað

Hannes Þ. Hafstein, eitt af björgunarskipum Slysavarnafélagsins Landsbjargar, var í dag statt við bryggju í Grindavík þegar það óhapp varð að skipið sigldi stjórnlaust af stað. Björgunarskipið tók þátt í aðgerðum þegar að togarinn Sóley Sigurjóns GK-200 strandaði við innsiglinguna í Sandgerði á fimmtudaginn.

Fram kemur í tilkynningu frá Slysavarnafélaginu að gangsetning skipa fari fram í vélarrúmi og fyrir hana var farið yfir stjórntæki í brú og voru þau eins og vera skyldi. Þegar skipið var hins vegar gangsett fór það á ferð og sleit sig frá bryggju.

„Björgunarsveitamenn sem staddir voru á bryggjunni sýndu mikið snarræði með því að stökkva um borð og náðu þeir tökum á skipinu og forðuðu með því slysi því í höfninni voru fleiri bátar á siglingu, m.a. með börn," segir í tilkynningu. Einnig var mikið af fólki á bryggjunni sjálfri þar sem nú fer fram hátíðin Sjóarinn síkáti í Grindavík.

Við skoðun á búnaði skipsins eftir atvikið kom ekkert fram sem gefur ástæðu til að ætla að stjórntæki hafi verið í ólagi. Líklegast er talið að einhver óviðkomandi hafi átt við þau þar sem mikill gestagangur var um borð í skipinu.

Í tilkynningunni eru allir þeir sem atvikið snerti beðnir velvirðingar.