Frávísunarkröfu Þorsteins Kragh hafnað

Kröfu Þorsteins Kragh um frávísun í máli hans var hafnað af dómara Héraðsdóms Reykjavíkur í dag. Þorsteinn er grunaður um aðild að stórfelldum innflutningi á fíkniefnum en Hollendingurinn Jacob Van Hinte var handtekinn um borð í Norrænu með um 190 kíló af hassi, eitt og hálft kíló af maríjúana og eitt kíló af kókaíni í bíl sínum. Þorsteinn var handtekinn um mánuði síðar og hefur setið í gæsluvarðhaldi í um hálft ár.

Verjandi Þorsteins, Helgi Jóhannesson, hélt því fram í frávísunarkröfunni að Þorsteinn hafi fengið gögn málsins afhent bæði seint og illa en samkvæmt lögum á hann rétt á að fá gögnin þremur vikum eftir að þau verða til. Að sögn Helga er um 156 tilvik að ræða þar sem það á að hafa verið brotið á réttindum Þorsteins. Á grundvelli þessa krafðist hann frávísunar en dómari féllst ekki á það.

Aðalmeðferð í málinu verður í héraðsdómi 23. og 24 febrúar næstkomandi.