Grunnskóli í Heilsuverndarstöðinni fær leyfi

Menntaráð Reykjavíkur samþykkti umsókn um starfsleyfi fyrir grunnskóla í gömlu Heilsuverndarstöðinni við Barónsstíg á fundi sínum í dag. Í skólanum verður lögð áhersla á skapandi skólastarf sem verður verulega frábrugðið hefðbundnu skólastarfi.

Aðstandendur grunnskólans eru Edda Huld Sigurðardóttir fyrrverandi skólastjóri Ísaksskóla, Þorvaldur Þorsteinsson rithöfundur, Jenný Guðrún Jónsdóttir kennari og Ólafur Stefánsson handboltamaður.

Kjartan Magnússon, formaður menntaráðs, segir umsóknina nú fara til menntamálaráðuneytisins, sem hefur endanlegt úrskurðarvald um hvort skólinn fái starfsleyfi eða ekki. Umsóknin var samþykkt með fjórum atkvæðum meirihlutaflokkana gegn þremur atkvæðum Samfylkingar og VG.

Fram kom í Fréttablaðinu nýverið að búið væri að skrá 40 börn í skólann með fyrirvara um að starfsleyfi fengist.