Ráðherra vill frekar íslenska einokun en danska

Jón Bjarnason, sjávarútvegs- og landbúnaðarráðherra, segir það afdráttar-lausa skoðun sína að íslenskt iðnaðarfyrirtæki, í þessu tilfelli Sementsverksmiðjan á Akranesi, eigi meiri tilverurétt í íslensku atvinnulífi en samkeppnisaðilinn sem flytur inn danskt sement. Samtök verslunar og þjónustu (SVÞ) gagnrýna harðlega boðskap á þessum nótum.

Jón tók málefni Sementsverksmiðjunnar til umfjöllunar á ríkisstjórnarfundi í gær. Komið hefur fram að samdráttur hjá verksmiðjunni er svo mikill frá efnahagshruninu að framtíð hennar er í hættu, sem er mat framkvæmdastjórans Gunnars H. Sigurðssonar. Á sama tíma er gagnrýnt að fyrirtæki í eigu ríkisins hafa keypt danskt sement frá Aalborg Portland á Íslandi.

„Ég spyr hvort misvitur samkeppnislög eigi að standa þjóðfélaginu fyrir þrifum,“ segir Jón. Hann segir mikilvægt að allt sé gert sem mögulegt er til að verja stöðu og framtíð íslenskrar sementsframleiðslu. „Það skýtur skökku við að opinberir aðilar skuli kaupa innflutt sement til sinna framkvæmda á sama tíma og barist er fyrir lífi og framtíð fyrirtækisins,“ segir Jón.

SVÞ taka til varna fyrir Aalborg Portland á Íslandi. Í fréttatilkynningu er bent á að fyrir-tækið hafi lagt í miklar fjárfestingar hér og þar starfi níu manns, og atvinna þeirra sé í hættu verði fótunum kippt undan starfsemi fyrirtækisins.

SVÞ benda á að öll stýring viðskipta hins opinbera við kaup á sementi færi gegn ríkjandi sjónarmiðum í samkeppnismálum og bryti beinlínis gegn ákvæðum samkeppnislaga. „Því verður þess vegna ekki trúað fyrr en á reynir að stjórnvöld muni standa fyrir aðgerðum sem komi á einokun á sements-markaði á ný. […] Einokun er nefnilega alltaf skaðleg, hvort sem hún er íslensk eða erlend,“ segir í tilkynningu samtakanna.

Þessari skoðun deilir ekki Jón Bjarnason með SVÞ og vitnar á heimasíðu sinni til orða Jóns Steindórs Valdimarssonar, framkvæmdastjóra Samtaka iðnaðarins, sem féllu í viðtali um Sementsverksmiðjuna fyrr á árinu:

„Ef það eru tveir valkostir í boði, íslensk einokun eða dönsk þá vildi ég frekar þessa íslensku.“

Ríkisstjórnin samþykkti í gær að fela iðnaðar- og umhverfisráðherra málið til athugunar og skila um það áliti. svavar@frettabladid.is