FÍS sýknað af kröfum Andrésar Magnússonar

Félag íslenskra stórkaupmanna var í dag sýknað af launakröfum Andrésar Magnússonar, fyrrum framkvæmdastjóra félagsins. Andrés taldi sig eiga inni laun vegna starfslokasamnings síns við fyrirtækið.

Andrés Magnússon starfaði sem framkvæmdastjóri FÍS til loka maí á síðasta ári. Í kjölfarið var gerður starfslokasamningur milli hans og félagsins sem fól í sér að hann myndi vinna að hámarki tvær vikur með nýjum framkvæmdastjóra FÍS og taka að sér tilfallandi ráðgjafarverkefni fyrir félagið.

Þann 30. júní á síðasta ári var Andrési tjáð á fundi með stjórnarmanni FÍS að það væri mat hans að forsendur stafslokasamnings væru brostnar, þar sem Andrés hafi með ráðningu sinni til samkeppnisaðilans, Samtaka verslunar og þjónustu, brotið bæði skrifaðar og óskrifaðar reglur um trúnaðarskyldu við FÍS

Andrés hélt því hinsvegar fram að upplýsingar hefðu farið milli félaganna í sameiningarviðræðum milli félaganna og því hefði það áhrif á trúnaðarskyldu hans við FÍS.

Það var mat dómsins að Félag íslenskra stórkaupmanna, og Samtök verslunar og þjónustu, væru hagsmunasamtök á sama sviði, sem eigi í samkeppni sín á milli um aðild verslunar- og þjónustufyrirtækja að samtökunum. Þau hafa tekjur af félagsgjöldum og fjöldi félagsmanna skiptir því máli fjárhagslega. „Verður því að telja að það samrýmdist ekki þeim trúnaðarskyldum sem stefnandi var bundinn gagnvart stefnda að taka við starfi framkvæmdarstjóra hjá félagi sem var í samkeppni við stefnda á sama tíma og hann þáði laun hjá stefnda samkvæmt starfslokasamningi."

Þá var mat dómsins að það hefði ekki áhrif á trúnaðarskyldu Andrésar þótt upplýsingar hafi farið á milli félaganna er viðræður þeirra um sameiningu stóðu yfir.

FÍS var því sýknað af kröfum Andrésar.