Sagði starfsmann Barnaverndar mannætu

Karlmaður á fertugsaldri hlaut í dag þriggja mánaða skilorðsbundinn fangelsisdóm fyrir hótanir en var sýknaður af ákæru um ærumeiðingar vegna fyrningar. Maðurinn var sakfelldur fyrir hótanir gagnvart starfsmanni Barnaverndarnefndar með því að hafa sent sms skilaboð í síma eiginmanns hennar og tvíburasona hennar.

Starfsmaðurinn sem hótanirnar beindust að hafði annast mál barna hins ákærða, drengs og stúlku, en forræði yfir þeim var í höndum móður þeirra. Ákærði mátti einungis sjá drenginn undir eftirliti. Fjölskylda ákærða fékk hinsvegar að sjá drenginn án eftirlits og fór það ekki vel í manninn sem í kringum áramótin 2006-2007 fór að senda skilaboðin í síma eiginmanns starfsmannsins og sona hennar.

Skilaboðin fólu oftast í sér spurningar. Í einu þeirra var þeirri spurningu beint að eiginmanni hennar hvort hann væri farinn að sjá að hún héldi fram hjá honum oft í viku og í öðru var spurt að því hvað kona hans væri að gera á einkamál.is.

Maður konunnar sagði fyrir dómi að flest skilaboðin hefðu borist kringum áramót 2006-2007. Þau hafi orðið svæsnari með tímanum en í skilaboðum til tvíburanna hefði kona hans verið vænd um mannát og fjölskyldunni verið hótað því að rakettu yrði skotið inn um gluggana. Annar tvíburasonur hans hefði fengið skilaboð þar sem stóð: ,,Hvað gerist ef annar tvíburinn fær rakettu í andlitið?"

Maðurinn var dæmdur í þriggja mánaða fangelsi en en fresta skal fullnustu refsingarinnar og hún falla niður að liðnum þremur árum haldi ákærði almennt skilorð.