Obama: Söguleg niðurstaða

Fulltrúadeild bandaríska þingsins samþykkti í nótt umdeilt frumvarp Barack Obama, forseta Bandaríkjanna, um breytingar á heilbrigðiskerfinu þar í landi. Sjálfur segir Obama að niðurstaðan sé söguleg. Hann er sannfærður um að öldungadeildin samþykki frumvarpið á næstu vikum og vonast til þess að það verði orðið að lögum fyrir áramót.

Frumvarpið felur í sér að nær öllum Bandaríkjamönnum verður boðið upp á heilbrigðisþjónustu á viðráðalegu verði og fleiri geta verið sjúkratryggðir.

Fulltrúadeildin samþykkti frumvarpið naumlega með 220 atkvæðum gegn 215. 219 demókratar og einn repúblíkani sögðu já en 39 demókratar og 176 repúblíkanar greiddu atkvæði gegn frumvarpinu.