Tvær M&M búðir í miðbænum

Ekki er enn ljóst hvert Bókabúð Máls og menningar fer eftir að versluninni við Laugaveg verður lokað 1. ágúst næstkomandi.

Verið er að meta stöðuna, að sögn Ingþórs Ásgeirssonar, framkvæmdastjóra verslanasviðs Pennans. Komið hafi til tals að vera á Laugavegi 26, þar sem Skífan er nú til húsa. Einnig hafi verið skoðað að fara í SPRON-húsið við Skólavörðustíg. „Sena [rekstarfélag Skífunnar] er eitt af þeim fyrirtækjum sem rætt hafa við okkur," segir Ingþór. Hann segir ákvörðun verða tekna fyrir lok þessarar viku. Ekki náðust samningar milli Pennans og Kaupangs, eigendafélags hússins, um áframhaldandi leigu.

Bókmenntafélagið Mál og menning hyggst stofna nýja bókabúð í húsinu við Laugaveg 18 sem mun bera heitið Mál og menning, þó að ekki sé reksturinn á vegum Pennans. Þetta segir Árni Einarsson, stjórnar formaður bókmenntafélagsins. Félagið seldi Pennanum rekstur Bókabúðar Máls og menningar fyrir sjö árum.

Bókmenntafélagið Mál og menning hyggst stofna bókabúðina með eigendum bókaverslunarinnar Iðu. Bókaverslun Iðu við Lækjargötu verður þó ekki lokað, að sögn Árna, enda verða ekki sömu áherslur í verslununum. Áhersla verður á innlendar bækur í nýju bókabúðinni. Aðspurður segist Árni ekki gera athugasemd við það að Penninn komi sér upp bókabúð Máls og menningar í miðbænum.

Fjármálastjóri Senu vildi ekki tjá sig um hvort til stæði að leigja Pennanum húsnæði Skífunnar við Laugaveg.- vsp