Atli Gíslason fjarverandi í Icesave umræðum

Þrír þingmenn eru á fjarvistaskrá Alþingis í dag þegar þriðja umræða um ríkisábyrgð á Icesave samningunum fer fram. Þeirra á meðal er Atli Gíslason, þingmaður Vinstri grænna.

Hann er einn þeirra flokksmanna sem lýsti hvað mestum efasemdum um frumvarpið við meðferð þess í þinginu.

Atli sagðist þó í viðtali við Ísland í bítið síðasta fimmtudag halda að málið hafi fengið góða lendingu fyrst það náðist samstaða um það. Hann hefði ekki getað hugsað sér að málið yrði keyrt í gegn á einföldum meirihluta.

Að mati Árna Þórs Sigurðssonar, fulltrúa VG í fjárlaganefnd, er allt eins líklegt að greidd verið atkvæði um frumvarpið í þinginu í dag.

Ef þær væntingar ganga eftir er næsta víst að hvorki Atli, né þau Árni Johnsen og Ólína Þorvarðardóttir sem einnig eru á fjarvistaskrá, taki þátt í atkvæðagreiðslunni. Þá munu aðrir þingmenn vera fjarverandi, án þess að hafa óskað eftir fjarvistarleyfi eða kallað inn varaþingmenn.