Innritun í framhaldsskóla var talsvert óvenjuleg

Innritun í framhaldsskóla fyrir haustönn 2009 er lokið. Fram kemur í tilkynningu frá menntamálaráðuneytinu að innritunin hafi að þessu sinni verið talsvert óvenjuleg af ýmsum sökum.

Í fyrsta lagi hafi verið óvenjumargir nemendur í framhaldsskólum í vor vegna mikillar innritunar á vorönn 2009. Í öðru lagi sóttu meira en 96% nemenda úr 10. bekk um skólavist og í þriðja lagi reyndi verulega á lagaákvæði um fræðsluskyldu allra barna innan átján ára aldurs.

Fram kemur í tilkynningunni að aðsókn í einstaka skóla hafi verið misjöfn þannig að nemendur fengu ekki endilega inni í þeim skóla sem þeir völdu. Nú hefur öllum ólögráða nemendum verið boðin skólavist, sem langflestir hafa þegið, og segja má að allir skólar á höfuðborgarsvæðinu séu fullmannaðir og raunar gott betur. Sama máli gegnir um flesta skóla á landsbyggðinni en þó gætu þar enn verið örfá sæti laus.