Salan á Landsvirkjunarhlutnum takmarkaði ábyrgðir borgarinnar

Fulltrúar Framsóknarflokks og Sjálfstæðisflokks í borgarráði segja að þegar Reykjavíkurborg seldi hlut sinn í Landsvirkjun hafi ekki aðeins fengist gott verð fyrir hlutinn heldur hafi salan einnig takmarkað verulega ábyrgðir borgarinnar. Dagur B. Eggertsson segir að sú staðreynd að ábyrgðir borgarinnar vegna skulda Landsvirkjunar nemi 110 milljörðum sé „enn einn áfellisdómurinn yfir sölu Reykjavíkurborgar á hlut sínum.“

Fulltrúar meirihlutans benda hins vegar á í bókun sinni vegna málsins að ef salan hefði ekki gengið í gegn væru ábyrgðir borgarinnar nú ríflega 150 milljarðar en ekki 110 en verðmæti hlutarins stendur nú í 32 milljörðum króna. Þeir benda einnig á að fulltrúar Samfylkingar og Vinstri grænna hafi barist harkalega gegn því að borgin seldi hlutinn.

„Þetta sýnir að salan á hlut Reykjavíkurborgar var vel tímasett og hefur stórlega dregið úr ábyrgðum Reykjavíkurborgar á þessu fyrirtæki," segir í bókuninni. „Eftir 1. janúar 2012 mun íslenska ríkið tryggja Reykjavíkurborg skaðleysi ábyrgða á skuldbindingum. Borgarráðsfulltrúar Framsóknarflokks og Sjálfstæðisflokks hafa fulla trú á starfsemi Landsvirkjunar og möguleikum fyrirtækisins í framtíðinni," segir ennfremur auk þess sem fullyrt er að í síðustu bókun borgarráðsfulltrúa Samfylkingar komi fram hreinar rangfærslur, algjörlega órökstuddar.

„Afar gott verð fékkst fyrir hlut Reykjavíkurborgar í Landsvirkjun. Það var mat allra þeirra sem komu að þessum samningum af hálfu Reykjavíkurborgar, þ.á.m. borgarhagfræðings," segir að lokum í bókuninni.