Borgin í ábyrgð vegna 110 milljarða af skuldum Landsvirkjunar

Reykjavíkurborg er í ábyrgðum vegna 110 milljarða af skuldum Landsvirkjunar að sögn Dags B. Eggertssonar oddvita Samfylkingarinnar í Reykjavík. Dagur vísar í svör  fjármálaskrifstofu borgarinnar við fyrirspurn Samfylkingarinnar um málið. Að mati Dags þýðir þetta að fari Landsvirkjun í þrot geta lánveitendur gengið að Reykjavíkurborg og krafið hana um greiðslu á eftirstöðvum kröfu sinnar.

Dagur segir ljóst að engan veginn hafi verið bundið tryggilega um þessa þætti við sölu á hlut Reykjavíkurborgar í fyrirtækinu. Í svörum fjármálaskrifstofunnar segir að í samningi um sölu á hlut Reykjavíkurborgar til ríkisins er ekki ákvæði um samskipti og eftirlit borgarinnar með rekstri og fjárhag Landsvirkjunar enda þótt aðstæður fyrirtækisins geti haft áhrif á hvort reyni á ábyrgðir borgarinnar.

„Þetta er enn einn áfellisdómurinn yfir sölu Reykjavíkurborgar á hlut sínum í Landsvirkjun," segir Dagur og bætir því við að brýnt sé að leitað verði leiða til að bæta úr þessu og framkvæmda áhættumat vegna þeirrar stöðu sem borgin er í gagnvart Landsvirkjun. Samfylkingin og Vinstri grænir lögðu fram í Borgarráði tillögu þess efnis að framkvæmt verði áhættumat vegna ábyrgða borgarinnar og var afgreiðslu hennar frestað.