Til stóð að myrða Clinton 1996

Minnstu munaði að Bill Clinton, þáverandi Bandaríkjaforseti, hefði orðið fórnarlamb hryðjuverkaárásar árið 1996 þegar hann var í heimsókn á Filippseyjum. Þetta kemur fram í nýrri bók bandaríska lagaprófessorsins Ken Gormley, en hann fékk upplýsingar um málið frá fyrrverandi yfirmanni lífvarðar forsetans. Örfáum mínútum áður en bílalest forsetans átti að aka yfir brú í höfuðborginni Manila bárust upplýsingar um að sprengja væri fest undir brúna og var þá ekið aðra leið. Það fylgdi sögunni að Osama bin Laden sjálfur hefði skipulagt tilræðið.