Sýn hinnar hagsýnu húsmóður

Kynjakvóti, sem kveður á um að í stjórnum 350 stærstu fyrirtækja landsins eigi hlutfall kvenna að vera minnsta kosti 40%, getur orðið að lögum fyrir jól. Það á að innleiða sýn hinnar hagsýnu húsmóður inn í íslenskt atvinnulíf, segir þingmaður Samfylkingarinnar.

Viðskiptanefnd barst tilskipun frá Evrópusambandinu þar sem mælst er til þess að hlutfall kvenna og karla sé sem jafnast í stjórnum fyrirtækja. Viðskiptanefndin vildi ganga lengra og fer nú hina norsku leið. Hún felur í sér að hlutfall hvors kyns í stjórnum fyrirtækja sem eru með fleiri en 50 starfsmenn megi ekki vera minna en 40%. Þetta á bæði við um hlutafélög og einkahlutafélög.

Málið hefur verið afgreitt úr nefnd og verður dreift á Alþingi nú í vikunni. Magnús Orri Schram, þingmaður Samfylkingar, vonast til að þetta verði að lögum fyrir jól.

„Þegar við tökum öll fyrirtæki í landinu þá eru 15% stjórnarmanna konur. Ef þú skoðar bara þau fyrirtæki sem hafa verið stofnuð frá hruni þá er þetta hlutfall kvenna komið niður í 11%. Það er þróun sem er ekki fýsileg og við viljum bregðast við," segir Magnús Orri.

Í tillögunni hafa fyrirtæki frest fram til 1. september árið 2013 til að uppfylla kynjakvótann. Þá kemur til greina að beita þau fyrirtæki sem ekki hafa gert það sektum.

Magnús Orri segir að það sé mat Alþingis að þegar fyrirtæki sé komið með yfir 50 starfsmenn þá sé það komið í hóp stærstu fyrirtækja landsins.

„Það er til hagsbóta fyrir endurreisn atvinnulífsins að konur komi að stjórnun fyrirtækja. Það kom svo bersýnilega í ljós á Íslandi á undanförnum árum að við gerðum fjölmörg mistök við stjórn okkar lykilfyrirtækja. Allar rannsóknir hafa sýnt að ef að konur koma að stjórnun fyrirtækja þá er þeim fyrirtækjum betur stjórnað," segir þingmaðurinn.

Magnús Orri segir að innleiða verði sýn hinnar hagsýnu húsmóður inn í íslenskt atvinnulíf.