Auglýsingar í kringum barnaefni áfram á Stöð 2

Ari Edwald, forstjóri 365, gerir ráð fyrir að auglýsingar í kringum barnaefni á Stöð 2 verði áfram í óbreyttri mynd. Hann segir að þrátt fyrir að miklu meira sjónvarpsefni fyrir börn sé sýnt á Stöð 2 hafi RÚV birt mun fleiri auglýsingar í kringum barnatímana hjá sér.

Stjórn RÚV samþykkti í gær að engar auglýsingar megi birta í tengslum við barnaefni sem sýnt er þegar líklegt er að börn horfi ein á sjónvarp fyrir klukkan sex á daginn.

Ari segir að málið horfi með öðrum hætti að Stöð 2 sem hafi umgengist auglýsingar á mun ábyrgari hátt en Ríkissjónvarpið. „Í fyrsta lagi höfum verið með miklu minna af auglýsingum í kringum barnaefni heldur en RÚV eins og mælingar hafa sýnt. Munurinn er ennþá meiri þegar horft var til þess það sem menn töldu óæskilegar auglýsingar í kringum barnaefni."

Í leiðbeiningum frá Talsmanni neytenda og Umboðsmanni barna er gerður greinarmunur á opinni og læstri dagskrá, að sögn Ara. Efni selt á DVD-diskum sé flokkað með með læstri dagskrá.

„Við höfum umgengist auglýsingar á miklu ábyrgari hátt en Ríkissjónvarpið hefur verið að gera. Þannig að það er eðlilegt að RÚV dragi úr þrátt fyrir að það snerti framkvæmdina hjá okkur," segir Ari.