Vaxandi skilningur á stöðu Íslands við setningu neyðarlaga

„Mér fannst heildarniðurstaðan vera sú að menn telja að það hafi vaknað meiri skilningur á þeirri stöðu sem Ísland var í þegar neyðarlögin voru sett en var í upphafi árs," segir Álfheiður Ingadóttir, formaður viðskiptanefndar.

Nefndin hittist á mánudag og fundaði um kvartanir erlendra fjármálastofnana og opinberra aðila til Eftirlitsstofnunar EFTA vegna setningu neyðarlaganna í fyrra haust.

Á fundinn komu fulltrúar utanríkis- og viðskiptaráðuneytisins auk lögmanns úr þjónustu forsætisráðuneytisins. Var það tilfinning þeirra að skilningur á stöðu Íslands við setningu neyðarlaganna væri að aukast að sögn Álfheiðar.

Álfheiður segir fyrstu kvartanirnar hafa borist ESA strax við fall bankanna í október síðastliðnum og eftir það hafi bæst í. Komið hafi gusa í júní og júlí og eitthvað í byrjun ágúst.

Hún segir nefndarfundinn á mánudag frekar ætlaðan til að fara yfir stöðu mála en að von sé einhverskonar aðgerðum eða inngripi úr þinginu.

„Þessi mál eru ekkert útkljáð og verða það ekki strax," segir Álfheiður. Hún segir vitað að reynt verði að hnekkja neyðarlögunum og það verði bara að koma í ljós hvernig það fari.