Ráðherrar gera grein fyrir fjárhagslegum hagsmunum sínum

Ráðherrar ríkisstjórnarinnar hafa nú allir gert grein fyrir fjárhagslegum hagsmunum sínum og trúnaðarstörfum sem þeir gegna. Ríkisstjórnin ákvað þann 17. mars síðastliðinn að gera grein fyrir þessum upplýsingum og nú hafa allir ráðherrarnir skilað þeim inn. Skemmst er frá því að segja að ráðherrar núverandi ríkisstjórnar eiga lítilla eða engra fjárhagslegra hagsmuna að gæta og gegna fáir þeirra einhversskonar trúnaðarstörfum fyrir utan flokka þeirra.

Kolbrún Halldórsdóttir umhverfisráðherra á sæti í Þjóðleikhúsráði en situr ekki í því á meðan hún er ráðherra.

Ögmundur Jónasson heilbrigðisráðherra hefur gegnt formennsku í BSRB frá árinu 1988 en frá því að hann tók sæti á Alþingi vorið 1995 hefur hann ekki þegið laun frá samtökunum að því undanskildu er hann þrívegis hefur tekið stutt launalaus leyfi frá Alþingi. Þegar Ögmundur tók við embætti heilbrigðisráðherra tók hann sér um leið leyfi frá störfum fyrir BSRB.

Össur Skarphéðinsson utanríkis- og iðnaðarráðherra er varaformaður í styrktarsjóði hjartveikra barna.

Gylfi Magnússon viðskiptaráðherra er með skrifstofuaðstöðu í Háskóla Íslands. Þá er hann í leyfi frá ýmsum stjórnarstörfum sem tengjast starfi hans fyrir Háskóla Íslands. Hann þiggur engin laun eða önnur fríðindi vegna þessa á meðan hann er í leyfi. Þá er Gylfi stjórnarformaður Norðurstígs ehf., sem er félag í eigu fjölskyldu eiginkonu Gylfa. Félagið á og rekur fasteign við Norðurstíg en stjórnarformennska Gylfa er ólaunuð.

Katrín Jakobsdóttir menntamálaráðherra segist sjá um stöku námskeið eða fyrirlestra um bókmenntir t.d. hjá Endurmenntun.

Upplýsingarnar eru í samræmi við reglur forsætisnefndar Alþingis um skráningu á fjárhagslegum hagsmunum alþingismanna og trúnaðarstörfum utan þings frá 16. mars 2009.

Hér má kynna sér svör ráðherranna betur.