Dólgapópúlismi Ögmundar

Yfirlýsing Ögmundar Jónassonar um að hann afþakki ráðherralaun markar nýjar lægðir í ódýrri yfirboðs- og yfirborðspólitík mánuði fyrir kosningar, segir á vefritinu Herðubreið sem tengist Samfylkingunni.

Ögmundur hefur afsalað sér ráðherralaunum meðan núverandi ríkisstjórn situr. Hann þiggur því þingfararkaup fyrir störf sín sem ráðherra og þingmaður.

„Skyldu líkurnar hafa aukist á því að Ögmundur verði ráðherra í næstu ríkisstjórn eða skyldu vera síðustu forvöð fyrir hann að slá enn eitt met í dólgapópúlisma?" segir í pistli Herðubreiðar.

Ritstjóri Herðubreiðar, Karl Th. Birgisson, er fyrrum framkvæmdastjóri Samfylkingarinnar. Auk Karls sitja í ritnefnd: Anna Pála Sverrisdóttir formaður Ungra jafnaðarmanna, Flosi Eiríksson bæjarfulltrúi, Guðmundur Andri Thorsson rithöfundur, Jens Sigurðsson varabæjarfulltrúi og Kristrún Heimisdóttir varaþingmaður.

Pistil Herðubreiðar er hægt að lesa hér.