Á írsku menningarrölti í miðjum niðurskurði

„Við fórum á sunnudaginn til Írlands og ræddum við þarlend yfirvöld um hátíðina en við getum haldið hana með minna umfangi en áður," segir Gunnar Birgisson, bæjarstjóri Kópavogs sem fékk heldur eitraðan pistil í morgunsárið þar sem Flosi Eiríkisson, bæjarfulltrúi Samfylkingarinnar, gagnrýndi hann harðlega fyrir að fara til útlanda vegna menningarhátíðar á meðan bæjarstarfsmenn þurfa að þola mikinn niðurskurð.

Gunnar kom aftur heim í gær en með honum í för var framkvæmdarstjóri menningarmála í bænum.

Greinin birtist í Morgunblaðinu í dag og forskrift hennar var: Forgangsröðun Gunnars.

Í greininni ritar Flosi að Gunnar I. Birgisson væri staddur á Írlandi að kynna sér pöbba og aðra menningu þarlendra sem undirbúning fyrir írska menningardaga. Á sama tíma hafa niðurskurðaraðgerðir verið kynntar skólayfirvöldum bæjarins þar sem fyrirhugað er að skera niður grunnþjónustu, til dæmdi stendur til að hækka matargjald í skólum bæjarins. Þess má geta að aðgerðirnar voru kynntar á þriðjudaginn, degi áður en Gunnar kom heim frá Írlandi.

Menningarhátíðin sem um ræðir er sú sjötta í röðinni og er fyrirhugað að hún hefjist í október í haust. Áður hefur bærinn haldið menningarhátíðir í tengslum við Kína, Rússland, Ekvador, Kanada, spán og nú er röðin kominn að Írlandi.

Aðspurður hvort hann telji gagnrýni Flosa ekki réttlætanlega svarar Gunnar: „Mín spurning á móti er þá - á að hætta menningarstarfsemi? Ég segi nei. Menningin þarf að lifa."

Gunnar bregst harkalega við gagnrýni Flosa og segir að hann hefði mátt mæta betur þegar meirihluti og minnihluti bæjarstjórnar ákváðu í sameiningu fjárhagsáætlun bæjarins.

Þá spyr hann einnig hvort viðhorf Flosa endurspegli viðhorf Samfylkingarinnar, það er að segja - að það eigi að hætta menningarstarfsemi vegna kreppu.

Spurður hvort það hefði ekki verið einfaldara, jafnvel ódýrara, að skipuleggja hátíðina með nútímatækni, svarar Gunnar því til að það þýði ekkert annað en að fara sjálfur. Hann hafi þurft að finna atriði, ræða við menningarráðuneyti Íra, taka ákvarðanir varðandi kostnað og svo framvegis.

Aðspurður hvernig ferðin hefði verið segir Gunnar að það hafi verið mjög gaman að vera Íslendingur í Írlandi.

Hátíðin verður haldin í byrjun október.