Uppblásin dúkka í framsætinu gagnast ekki

Vinnuvélarnar eru komnar á svæðið og framkvæmdir hafnar við hinn nýja Hlíðarfót, en svo nefnist vegurinn sem liggja mun frá Hringbraut á móts við Umferðarmiðstöðina og að Loftleiðahótelinu. Vegurinn á að vera tilbúinn í janúar þegar Háskólinn í Reykjavík hefur starfsemi sína við rætur Öskjuhlíðar. Umhverfis og samgönguráð Reykjavíkur ákvað í gær að hefja undirbúning að því að takmarka umferð um væntanlega götu á morgnana þannig að á álagstíma verði þeim bannað að aka sem eru einir í bíl.

Þorbjörg Helga Vigfúsdóttir, formaður ráðsins, segir talið að umferðin þarna verði ansi þétt þegar þrjúþúsund nemendur aka inn á svæðið á morgnana. Reynt sé með öllum ráðum að greiða fyrir henni.

Bannið er einungis hugsa á kaflanum frá Hringbraut að væntanlegum gatnamótum við Loftleiðahótel. Þeim sem eru einbíla verður áfram leyft að fara um Flugvallarveg, sem verið er að breikka þessa dagana, og síðan áfram niður í Nauthólsvík.

Erlendis hafa ökumenn reynt að fara í kringum svona reglur með því að hafa uppblásna dúkku í framsætinu sér við hlið. Í Reykjavík vonast menn til að eftirlitsmyndavélar sjái við slíkum brögðum.

En eru Íslendingar kannski of miklir smákóngar og bílaþjóð til að þola svona frelsisskerðingu?

Þorbjörg Helga kveðst trúa að landsmenn og Reykvíkingar sérstaklega sjái að það sé komið að einhverjum nýjum lausnum og séu tilbúnir að prófa svona hluti. Svo verði menn að taka afstöðu til þess hvort þetta gengur vel eða ekki.