KR hefur ekki áhuga á Bjarna Ólafi

Orðrómur þess efnis að landsliðsbakvörðurinn Bjarni Ólafur Eiríksson væri á leið frá Val yfir í KR á sér enga stoð í raunveruleikanum. Það staðfesti Kristinn Kjærnested, formaður knattspyrnudeildar KR, við Vísi í dag.

„Við erum með góðan bakvörð í Diogo sem á eitt ár eftir af samningi. Við erum að vinna í því að framlengja þann samning. Bjarni Ólafur er því ekki í myndinni hjá okkur og við höfum ekkert rætt við hann," sagði Kristinn.

Kristinn sagði KR-inga hafa rætt lauslega við Helga Sigurðsson en sagði félagið ekki búast við því að hann færi til KR.

Flest benti til þess að hann myndi semja við Víking.