Ánægð með góðan árangur í krabbameinslækningum karla

Fjöldi þeirra sem læknast alveg af krabbameini - en ná ekki bara að lifa fyrstu 5 ár eftir greiningu - eykst stöðugt. Þetta kemur fram í niðurstöðum langtíma faraldsfræðirannsóknarinnar EUROCARE-4 sem birtust nýlega í European Journal of Cancer.

Rannsóknin bar saman tvö tímabil - 1988-1990 og 1997-1999 - og er niðurstaðan sú að hlutfall sjúklinga sem læknast höfðu af lungnakrabbameini jókst úr 6 í 8%, af magakrabbameini úr 15 í 18% og af ristil- og endaþarmskrabbameini úr 42 í 49%. Einnig kom fram marktækur munur á líkum á lækningu eftir löndum.

Þetta kemur fram í tilkynningu frá krabbameinsfélaginu en Vísir sagði frá rannsókninni í morgun. Í tilkynningunni segir einnig að þegar öll krabbamein eru tekin saman kemur í ljós að hlutfall karla sem læknast er hæst á Íslandi (47%) en í Frakklandi og á Finnlandi er hæst hlutfall kvenna sem læknast (59%).

Lægsta hlutfall lækningar hjá bæði körlum (21%) og konum (38%) var í Póllandi. „Það má segja að þessi munur byggist að hluta til á mismunandi tíðni ólíkra krabbameina eftir löndum. Þetta hlutfall er því einnig til marks um mismikið krabbameinseftirlit og endurspeglar framfarir við greiningu og meðferð, jafnt sem árangur við að koma í veg fyrir banvænustu krabbameinin," segir Dr. Riccardo Capocaccia hjá ítölsku miðstöðinni fyrir faraldsfræði, eftirlit og lýðheilsu í Róm, en hann ritstýrði nýjasta riti European Journal of Cancer sem var helgað niðurstöðunum.

Lungnakrabbamein dregur konurnar niður

„Við erum að vonum mjög ánægð með þennan árangur og að íslenskum karlmönnum vegni svo vel eftir krabbameinsgreiningu," segir Guðrún Agnarsdóttir, forstjóri Krabbameinsfélags Íslands.

„Þarna eru sterk áhrif lang algengasta meinsins, blöðruhálskirtilskrabbameins, en Ísland er í næst efsta sæti hvað varðar hlutfall karla sem læknast af þeim sjúkdómi. Önnur skýring tengist því að á Íslandi greinast hlutfallslega fáir karlar með lungnakrabbamein, en þar eru horfurnar ekki góðar. Íslenskar konur koma einnig vel út í samanburðinum, en 55% þeirra læknast. Bilið var frá 38% til 59% hjá þeim sem tóku þátt í rannsókninni. Það sem helst dregur íslensku konurnar niður er að hlutfall lungnakrabbameins af öllum meinum er með því hæsta sem gerist í Evrópu."

Mikill munur er á hlutfalli kvenna sem læknast (55 - 73%) í kjölfar brjóstakrabbameinsgreiningar eftir löndum, en Pólland, Tékkland og Slóvenía voru þar langt á eftir nágrönnum sínum í vestri. „Þessi munur hefur m.a. verið þakkaður hópleit að brjóstakrabbameini sem hófst um og eftir miðjan tíunda áratuginn í þó nokkrum Vestur-Evrópulöndum. Ef svo er, má ætla að snemmgreining geti bjargað fjölda kvenna með brjóstakrabbamein og auðveldað lækningu," segir Dr. Capocaccia.

Nauðsyn krabbameinsskráningar

Prófessor Alexander M. M. Eggermont, forseti ECCO (European CanCer Organisation) fagnar þessum nýju upplýsingum. „EUROCARE-4 veitir nauðsynlegar upplýsingar um mynstur á lífslíkum fólks í baráttu við krabbamein um alla Evrópu. Án þessara upplýsinga væri ómögulegt að meta hvort að nýjungar í greiningu á krabbameinum, meðferð og umönnun skili í raun einhverjum árangri fyrir sjúklinga. Þær segja okkur einnig hvaða tegundir krabbameina og hvaða svæði Evrópu þarf að leggja áherslu á við frekari uppbygginu, rannsóknir og fjárfestingar.

Góðu fréttirnar eru að lækning á krabbameini hefur aukist á níunda og tíunda áratugnum. Það var mikill munur milli landa; hins vegar er megnið af þessari aukningu vegna landa þar sem lífslíkur voru litlar, og umbætur þar eiga stóran þátt í því að munurinn á lífslíkum milli Evrópulanda hefur minnkað," segir Prófessor Eggermont, en EUROCARE rannsóknin byggir á 93 krabbameinsskrám frá 23 löndum í Evrópu.

Krabbameinsskrár lykilatriði

„Krabbameinsskrár eru lykilatriði þegar kemur að mati á áhrifum forvarna, meðferðar og snemmgreiningar krabbameina. Skrárnar leyfa samanburð á nýgengi og lífslíkum milli landa og þannig má öðlast skilning á því hvernig viðkomandi land stendur að vígi varðandi forvarnir og aðbúnað krabbameinssjúklinga" segir Laufey Tryggvadóttir, framkvæmdastjóri Krabbameinsskrárinnar.

„Þessi þekking er mikilvæg svo hægt sé að fylgjast með áhrifum framfara í greiningu og meðferð og finna bestu nýtingu fjármagnsins, svo hægt sé að auka bæði lífslíkur og von hjá fólki sem þarf að kljást við krabbamein."