Litháarnir störfuðu hjá Íslendingunum

Þrír íslenskir karlmenn voru úrskurðaðir í gæsluvarðhald í Héraðsdómi Reykjaness í gær, á grundvelli aðildar að meintu mansalsmáli á Suðurnesjum, þjófnaðarbrota og tryggingasvika.

Þá var gæsluvarðhald framlengt yfir fimm litháískum karlmönnum sem setið hafa inni vegna gruns um aðild að sama máli. Hópurinn skal sitja í gæsluvarðhaldi til klukkan fjögur 28. október.

Rannsókn lögreglu er afar viðamikil, enda rökstuddur grunur um skipulagða glæpastarfsemi hópsins í brotum af ýmsu tagi, þar á meðal ofbeldisbrotum.

Lögreglustjórinn á Suðurnesjum lagði í gær fram kröfu um framlengingu í viku yfir Litháunum og gæsluvarðhald sömuleiðis í viku yfir Íslendingunum og féllst héraðsdómur á hana.

Íslendingarnir sem um ræðir voru handteknir í fyrradag ásamt tveimur konum sem hefur verið sleppt eftir yfirheyrslur hjá lögreglu. Mennirnir eru, samkvæmt upplýsingum Fréttablaðsins, allir af höfuðborgarsvæðinu.

Farið var í sex húsleitir í tengslum við handtökur Íslendinganna. Leitað var á heimilum, í fyrirtækjum og annars konar húsnæði.

Aðgerðirnar voru viðamiklar og við þær naut Lögreglan á Suðurnesjum aðstoðar lögreglumanna frá Lögreglustjóranum á höfuðborgarsvæðinu, Lögreglustjóranum í Stykkishólmi og Ríkislögreglustjóranum. Í þeim voru ýmis gögn haldlögð til frekari rannsóknar hjá lögreglu.

Tengsl eru milli mannanna níu sem sitja inni. Litháarnir vinna hjá verktakafyrirtæki sem tveir af Íslendingunum eiga. Lögregla útilokar ekki að um frekari handtökur og húsleitir verði að ræða.

Málið teygir sig einnig til embættis sýslumannsins á Snæfellsnesi. Nokkrir úr hópnum sem nú sitja inni eru grunaðir um afbrot í umdæmi hans og er sá angi til rannsóknar hjá lögreglunni.

Upphaf málsins má rekja til þess að nítján ára litháísk stúlka var stöðvuð við komuna til landsins fyrr í mánuðinum eftir að hún hafði látið ófriðlega í flugvél á leið hingað til lands. Stúlkan var með fölsuð skilríki og grunur leikur á að til hafi staðið að selja hana í vændi hér á landi.

Ekkert hefur spurst til litháísks karlmanns sem lýst var eftir í kjölfar þess að stúlkan kom hingað til lands. Talið er að hann hafi farið af landi brott.

Stúlkan er í umsjá embættis Lögreglustjórans á Suðurnesjum sem fer með rannsókn málsins. Alþjóðadeild ríkislögreglustjóra hefur unnið að athugun á bakgrunni hennar í heimalandinu.