Átak gegn ölvunarakstri á höfuðborgarsvæðinu

Hafið er sérstakt átak lögreglunnar á höfuðborgarsvæðinu gegn ölvunarakstri í umdæminu en það mun standa yfir í tæpar fjórar vikur. Í tilkynningu frá lögreglu segir að skipulegu eftirliti verði haldið úti á ýmsum tímum sólarhrings og á mismunandi stöðum.

„Markmið átaksins er að vekja athygli á þeirri hættu sem stafar af ölvunarakstri og hvetja fólk til almennrar varkárni í umferðinni. Minnt er á viðvörunarorðin „eftir einn ei aki neinn", en þau eiga alltaf við," segir ennfremur og því bætt við að átakið nái að sjálfsögðu einnig til aksturs undir áhrifum fíkniefna en afleiðingar þess geta sömuleiðis verið skelfilegar.

„Vegna þessa mega ökumenn búast við því að verða stöðvaðir víðsvegar í umdæminu. Átakið nú, sem er unnið í samvinnu við embætti ríkislögreglustjóra, kemur til viðbótar því öfluga umferðareftirliti sem lögreglan á höfuðborgarsvæðinu heldur jafnan úti. Hvergi verður slakað á í þeim efnum," segir lögreglan að lokum.