Sjúkrahús dauðans í Basildon

Áætlað er að allt að 400 sjúklingar á háskólasjúkrahúsinu í Basildon á Englandi látist ár hvert vegna ónógrar umönnunar, ófullnægjandi hreinlætis og vanhæfra stjórnenda. Þetta er meðal þess sem fram kemur í kolsvartri skýrslu breskra heilbrigðisyfirvalda um sjúkrahúsið en fjöldi dauðsfalla þar er þriðjungi yfir meðaltali breskra sjúkrahúsa. Í skýrslunni eru nefnd dæmi um að tjöld, sem dregin eru á milli sjúkrarúma, séu alblóðug, lífgunarbúnaður bilaður eða óáreiðanlegur og að sjúklingar hafi verið látnir liggja á slysa- og bráðadeildum í allt að tíu klukkustundir. Að auki segir í skýrslunni að ekkert hjúkrunarfólk, sérhæft í barnalækningum, finnist á sjúkrahúsinu og að ófaglært fólk sé látið annast lyfja- og matargjafir. Skýrslan kemur í kjölfar annarrar skýrslu um sjúkrahús í Staffordshire þar sem fullyrt er að komast hefði mátt hjá 1.200 dauðsföllum með betri vinnubrögðum.