Auka á hlut kvenna í sveitarstjórnum

Alþingi hefur ályktað að Ásta R. Jóhannesdóttir, félags- og tryggingamálaráðherra, feli Jafnréttisstofu að hrinda af stað aðgerðum til að efla hlut kvenna í sveitarstjórnum.

Þetta kemur fram í tilkynningu frá félagsmálaráðuneytinu. Þar segir ennfremur að hlutur kvenna í sveitarstjórnum hafi aukist mjög hægt þrátt fyrir meiri umræðu um mikilvægi þess að fjölga konum í stjórnmálum á undanförnum árum.

„Hlutur kvenna í sveitarstjórnum hefur aukist mjög hægt þrátt fyrir meiri umræðu um mikilvægi þess að fjölga konum í stjórnmálum á undanförnum árum. Konur voru þannig eingöngu um tæp 36% allra sveitarstjórnarmanna á landinu eftir síðustu sveitarstjórnarkosningar 2006. Hlutfall kvenna í nefndum, ráðum og stjórnum sveitarstjórnarmanna var svipað."

Þá segir að konur séu í meirihluta í sveitarstjórnum í tíu sveitarfélögum á landinu en í sjö sveitarfélögum sé engin kona meðal sveitastjórnarmanna. Einungis fjórðungur oddvita sveitastjórna er konur.

Félags- og tryggingamálaráðherra sem jafnframt er ráðherra jafnréttismála segir mjög mikilvægt að fjölga konum í sveitarstjórnum því „jafnræði milli kynja í stjórnmálum eykur líkurnar á því að hagsmunir heildarinnar séu hafðir að leiðarljósi þegar ákvarðanir eru teknar."

„Jafnréttisstofa býr yfir mikilli þekkingu á stöðu kvenna í samfélaginu og er því vel til þess fallin að annast aðgerðir til auka hlut kvenna í sveitarstjórnum. Verður meðal annars lögð áhersla á samstarf við samgönguráðuneyti sem fer með málefni sveitarstjórna, Samband íslenskra sveitarfélaga sem og stjórnmálaflokkana sem bjóða fram til sveitarstjórna."

Sveitarstjórnarkosningar verða næst haldnar vorið 2010.