Bætist á meiðslalista United

Sir Alex Ferguson, knattspyrnustjóri Manchester United, segir að sigurinn á Derby í kvöld falli í skuggann af meiðslum sem leikmenn hans urðu fyrir í leiknum. Jonny Evans, Rafael da Silva, Anderson og Nani meiddust allir.

Rafael fór af velli í fyrri hálfleik og óttast Ferguson að hann verði frá í nokkrar vikur. Ekki er vitað hversu alvarlega meiðsli Nani eru en Anderson var borinn af velli undir lokin á börum og er hann nú í skoðun á sjúkrahúsi.

United hafði framkvæmt allar sínar skiptingar þegar Evans meiddist og kláraði hann leikinn haltrandi. Ferguson reiknar með því að hann verði frá í viku vegna meiðsla sinna og leiki því ekki á laugardag þegar United mætir Tottenham.