Gæti tekið fjóra mánuði í viðbót

Katrín Jakobsdóttir menntamálaráðherra segir að umsókn Menntaskólans hljóti enga sérmeðferð við leyfisveitingu. Skoða þarf umsóknina í heild. Gæti meðferð ráðuneytisins tekið um fjóra mánuði.

Menntaráð Reykjavíkurborgar samþykkti umsókn Menntaskólans fyrir sitt leyti í gær. Menntamálaráðuneytið veitir hins vegar endanlegt starfsleyfi. Í nýrri reglugerð, sem ekki er búið að samþykkja af ráðherra, er tími leyfisveitinga áætlaður fjórir mánuðir.

„Um leið og við fáum leyfið förum við af stað," segir Edda Huld Sigurðardóttir, skólastjóri Menntaskólans. Skólinn hefur sótt um að starfa í gamla Heilsuverndarhúsinu við Barónsstíg.

Hún segir að ekki þýði að æsa sig yfir málshraða menntamálaráðuneytisins þar sem það myndi ekki hjálpa. „Nú bíðum við bara auðmjúk eftir að ráðuneytið fjalli vel um umsóknina," segir Edda.

Búið er að skrá yfir 40 börn í skólann og segir Edda að foreldrarnir muni líklega skrá þau úr skólanum ef þetta tekur langan tíma. Spurð hvort þetta hafi neikvæð áhrif á trúverðugleika skólans telur hún svo ekki vera.

„Ef hlutirnir eru vel úr garði gerðir þá er þetta í lagi," segir Edda.- vsp