McAllister ráðinn til starfa hjá Portsmouth

Gary McAllister, fyrrum leikmaður og stjóri hjá Leeds United, verður aðstoðarstjóri hjá Hermanni Hreiðarssyni og félögum í Portsmouth. Portsmouth er búið að tapa sjö fyrstu leikjum sínum í ensku úrvalsdeildinni og hefur þurft að leika án íslenska landsliðsfyrirliðans í þeim öllum.

McAllister mun aðstoða Paul Hart en McAllister hafnaði því að gerast aðstoðarmaður George Burley hjá skoska landsliðinu. McAllister mun koma í staðinn fyrir Brian Kidd sem vildi ekki halda áfram á Fratton Park í haust.

McAllister er orðinn 44 ára gamall en lék á sínum tíma með Motherwell, Leeds, Coventry aog Liverpool auk þess að spila 57 landsleiki fyrir Skota. Hann var spilandi stjóri hjá Coventry og stýrði síðan Leeds í eitt og hálft tímabil.