Handsnyrting og brúnkumeðferð eru á undanhaldi

„Ég hugsa að þetta sé tíma­bundin minnkun í aðsókn í handsnyrtingu, þetta kemur aftur. Konu sem fer í handsnyrtingu líður svo miklu betur með sjálfa sig,“ segir Heiðar Jónsson snyrtir. Samkvæmt lauslegri könnun Fréttablaðsins virðist sem aðsókn í handsnyrtingu og brúnkumeðferð hafi minnkað eftir hrun bankanna. Þær upplýsingar fengust hjá snyrtistofunum Laugum Spa, Helenu fögru, Snyrtistofu Ágústu og Nordica spa að konur létu lengra líða á milli vinsælustu meðferðanna, svo sem augnabrúnaplokkunar og fótleggjavax, og dýr andlitsböð og lúxusmeðferðir eru ekki eins vinsæl og áður. Ekki hefði viðskiptavinum fækkað sem vildu vaxmeðferð á fótleggi og plokka augabrúnir heldur reyndu konur að bíða lengur en áður með vaxið. Færri kæmu hins vegar og vildu láta sprauta líkamann í brúnum tónum eða láta setja á sig gervi­neglur.

Hins vegar seljast snyrtivörur jafn vel og fyrr og tvö stór snyrtivöruumboð, Forval og Terma, sem hafa umboð fyrir mörg þekktustu merkin, segjast ekki áður muna svo góða sölu í ilmvötnum. „Fólk er farið að fara sjaldnar í gegnum Fríhöfnina, sem hefur hingað til séð um stóran hluta ilmvatnssölunnar og við finnum fyrir því að Íslendingar kaupa því ilmvötnin sín meira hér í búðunum heima,“ segir Hildur Ingadóttir, sölumaður hjá Terma. Guðrún Edda Haraldsdóttir, markaðsstjóri Forvals, segist hafa orðið vör við að fólk leiti einnig í ódýrari merki en áður. „Það kaupir kannski ekki minna af neinu, nema þá helst lúxuskremunum en varalitirnir og farðinn eru frekar valdir úr ódýrari merkjunum en þeim dýrari.“

Heiðar snyrtir segir það ekki koma sér á óvart að fólk láti dýrar snyrtivörur mæta afgangi. „Ef við þurfum að spara eigum við að láta sparnaðinn sjást á ódýrari farða en passa að láta ekki sjálfa umhirðuna mæta afgangi. Þetta er bara eins og með bílinn manns – til að hann gangi þarftu að láta smyrja hann en þú bíður kannski með að sparsla upp í rispurnar.“

juliam@frettabladid.is