Smygluðu kókaínvökva frá Hondúras

Tveir menn voru dæmdir í annarsvegar átján mánaða fangelsi og svo tólf mánaða fangelsi fyrir að hafa smyglað fljótandi kókaíni til landsins frá Hondúras í Suður-Ameríku. Fíkniefnalögreglan fékk fyrst pata af smyglinu þegar bandaríska fíkniefnalögreglan, DEA, hafði samband við fíkniefnalögregluna hér á landi síðasta haust. Þeim var kunngjört að rommflaska full af kókaínvökva væri á leið til Íslands með póstþjónustunni FedEx.

Þegar flaskan kom til landsins kannaði fíkniefnalögreglan innihald hennar. Í ljós kom að í flöskunni voru rúm átján hundruð grömm af kókaínvökva. Hægt var að drýgja efnið upp í rúmt hálft kíló af kókaíndufti.

Lögreglan skipti efninu út fyrir annan vökva, síðan fór lögreglumaður í dulagervi sendils til viðtakanda flöskunnar sem veitti henni viðtöku. Í kjölfarið var hann handtekinn ásamt öðrum manni.

Við yfirheyrslur kom í ljós að mennirnir höfðu ekki fengið sambærilegar sendingar áður. Í dómsorði segir að hægt sé að koma efninu í neytanlegt form með því að láta vatnið og áfengið gufa upp úr því og sía það síðan í gegnum kaffipoka með aseton. Heildarverðmæti efnisins var á bilinu 6 til 7 milljónir króna.

Báðir mennirnir sættu gæsluvarðhaldi vegna málsins og dregst það frá dómi þeirra. Við húsleit fann lögreglan 11 grömm af kókaíni, rúm 4 grömm af maríjúana, MDMA og 150 millilítra af hassolíu. Öll efnin voru gerð upptæk.