Bólívíumenn ræna mexíkóskri flugvél

Flugræningjar sem eru taldir vera frá Bólivíu rændu mexíkóskri flugvél með hundrað farþegum innanborðs samkvæmt BBC. Vélin var á leiðinni til Cancun í Mexíkó þegar ræningjarnir létu til skara skríða. Vélinni var þá snúið til Mexíkó-borgar þar sem hún lenti.

Samkvæmt mexíkóskum fréttamiðlum þá eru þrír bólivískir flugræningjar um borð. Þeir munu vera vopnaðir sprengjum og hafa hótað að sprengja vélina í loft upp fái þeir ekki að ræða við forseta Mexíkó, Felipe Calderon.

Haft hefur verið eftir lögreglu að mennirnir hafi límt sprengjurnar á líkama sinn.

Hluta af farþegunum hafa verið veitt frelsi en ekki er ljóst hversu margir hafa stigið frá borði. Alls voru 104 um borð ásamt áhöfn vélarinnar.