Toppar BBC hafa að jafnaði hærri laun en Gordon Brown

Breska ríkisútvarpið BBC greiðir hundrað hæst launuðu starfsmönnum sínum samtals 20 milljónir punda á ári, jafnvirði rúmlega fjögurra milljarða króna. Að meðaltali hlýtur hver þessara hundrað starfsmanna 199.316 pund í árslaun, fimm þúsund pundum meira en það sem forsætisráðherra landsins, Gordon Brown, ber úr býtum. Það var breska ríkisútvarpið sjálft sem gaf þessar tölur út til að vekja athygli á þeirri kröfu að launakostnaður opinberra aðila sé uppi á borðinu og almenningur eigi þess kost að kynna sér hann til hlítar. Hæstu launin hjá BBC hefur Mark Thompson útvarpsstjóri og nema þau 834.000 pundum á ári eða 172,6 milljónum. Það gera rúmar 14 milljónir á mánuði. Þau laun munu þó að líkindum lækka á næstunni þar sem BBC neyðist til að skera launakostnað niður um fjórðung á næstu þremur árum.