Lögregla rannsakar vettvang skemmdarverks

Tæknideild lögreglu heimsótti hús Sigurðar Einarssonar, fyrrum bankastjóra Kaupþings, í dag til að rannsaka skemmdarverk sem unnin voru á húsi hans í nótt.

Rauðu lakki var sprautað á hlið hússins á Seltjarnarnesi, en þetta er enn eitt skemmdarverkið sem beinist að mönnum og konum sem tengdust íslensku útrásinni eða hruninu.

Svo vitað sé hefur rauðri málningu einnig verið slett á hús í eigu Björgólfs Guðmundssonar, Hannesar Smárasonar, Birnu Einarsdóttur, Karls Wernerssonar og Hreiðars Más Sigurðssonar.

Þá hefur einnig verið kveikt í jeppa fyrrverandi fjármálastjóra Baugs, auk þess sem Hummer bifreið Björgólfs Thors var lökkuð rauð síðastliðna nótt.

Samkvæmt lögreglu þarf ekki að kæra mál af þessum toga, þau fara sjálfkrafa í sakameðferð. Ekki er vitað hverjir voru að verki og enginn hefur verið handtekinn.

Í langflest skiptin sem rauðri málningu hefur verið beitt hefur tilkynning um atvikin borist fjölmiðlum eftir sömu leiðum. Tölvupóstur er sendur frá aðila sem kallar sig „skap ofsa". Fréttastofa hefur sent þessum aiðila fyrirspurnir en ekki borist svar.