Björgvin G. fékk víst styrk frá Baugi

Björgvin G. Sigurðsson þingmaður Samfylkingarinnar fékk 300 þúsund krónur í styrk frá Baugi vegna þáttöku í prófkjöri árið 2007. DV hafði greint frá þessu á miðvikudaginn en Sigurður G. Guðjónsson lögmaður sem var kosningastjóri Björgvins á sínum tíma hafði samband við blaðið og þvertók fyrir að Björgvin hefði þegið styrk frá Baugi. DV birtir hins vegar í dag frétt um að blaðið hafi nú sannreynt að styrkurinn hafi verið greiddur.

„Reikningurinn var gefinn út af stuðningsmannafélagi þingmannsins, Kosningafélagi Björgvins G. Sigurðssonar og greiddur af Baugi," segir í frétt á heimasíðu DV.

Þar segir að félagið sé skráð til heimilis að Hrafnhólum 7 og með kennitölu 671006-1510. Sigurður sagði í samtali við DV á miðvikudag að framboð Björgvins hafi fengið afskaplega lítið af styrkjum í baráttunni, smávægilegar upphæðir frá Sunnlendingum og auk þess sem fjölskylda þingmannsins hjálpaði honum með rest. Enga ofurstyrki hafi verið um að ræða. Frétt DV um málið má sjá hér.