Framleiðandi AK-47 á leið á hausinn

Stærsti vopnaframleiðandi Rússlands sem kallast Izhmash stendur frammi fyrir gjaldþroti. Fyrirtækið er þekktast fyrir að framleiða Kalashnikov vélbyssuna sem einnig er þekkt undir nafninu AK-47. AK-47 er útbreiddasta vélbyssa sögunnar og hefur hún komið við sögu í flestum ef ekki öllum stríðum sem háð hafa verið frá lokum seinni heimstyrjaldarinnar.

Byssan hefur verið framleidd í fjölda landa og í svo mörgum eintökum að fleiri Kalashnikovar hafa runnið af færibandinu en af öllum öðrum vélbyssum til samans. AK-47 þykir bera af í hönnun fyrir einfaldleika og lágan framleiðslukostnað. Þá þykir hún einstaklega endingargóð og er talið að hver riffill endist að meðaltali í 20 til 40 ár.

Áhrif byssunnar hafa verið gríðarleg og er AK-47 eina vörumerkið sem fengið hefur þann virðingarsess að vera á þjóðfána ríkis. Byssan lék svo stórt hlutverk í frelsisstríði Mosambík að ákveðið var að hafa mynd af byssunni á fánana landsins.

Lengi vel var ekkert einkaleyfi á framleiðslu AK-47 en Izhmash fékk loksins einkarétt á bysunni árið 1999. Þrátt fyrir það eru AK-47 framleiddar víða um heim án leyfis og því ekki við því að búast að byssan hverfi af sjónarsviðinu þrátt fyrir að upphaflegi framleiðandinn hafi lagt upp laupana.