Auglýsendur flýja sökkvandi Woods

Kylfingurinn Tiger Woods á ekki sjö dagana sæla eftir að í hámæli komst hve djarftækur hann er til kvenna. Nú snýr hver stuðningsaðilinn á fætur öðrum baki við honum, síðast ráðgjafarfyrirtækið Accenture sem notað hefur andlit Woods í auglýsingum sínum síðastliðin sex ár. Mynd af kylfingnum hafði verið fjarlægð af heimasíðu fyrirtækisins á föstudag. Þá segja talsmenn snyrtivöruframleiðandans Gillette að þeir hafi einnig hugsað sér að taka Woods af launaskrá hjá sér. Fjarskiptafyrirtækið AT&T, sem auglýsir á golfpoka Woods, fer að öllum líkindum að dæmi hinna tveggja.