Lögreglan varar við flugmiðasvikurum

Lögreglan á Suðurnesjum hefur síðustu daga haft afskipti af 12 aðilum í Flugstöð Leifs Eiríkssonar vegna þess að greitt hafði verið fyrir farmiða þeirra með stolnum greiðslukortum. Um svikamyllu virðist vera að ræða en lögregla segir að þeir sem keyptu miðana virðast ekkert tengjast innbyrðis og er frásögn þeirra af því hvernig þeir keyptu miðana öll á sömu lund.

„Fólkið segist hafa keypt farmiða sína á internetinu af óþekktum millilið sem bauð flugferðir á mjög góðu verði („last-minute" miða). Fólkið fékk síðan sent bókunarnúmer með e-mail mjög skömmu fyrir brottför og var sagt að fara í flugstöðina, sýna bókunarnúmerið og framvísa vegabréfi," segir í tilkynningu frá lögreglunni.

Að sögn lögreglu vissu menn í flugstöðinni að miðarnir hefðu verið keyptir með stolnum greiðslukortum og því var fólkinu meinað að halda áfram för sinni. „Allir sem stöðvaðir hafa verið eru af erlendu bergi brotnir og flest bendir til að þeir aðilar sem sviku fólkið séu erlendis," segir einnig.

Þá segir í tilkynningu lögreglu að fleiri en þessir 12 aðilar hafa keypt farmiða með sama hætti að undanförnu en svikin ekki komist upp í tæka tíð. „Af þessu tilefni vill Lögreglan á Suðurnesjum vara fólk við því að kaupa flugfarseðla af óþekktum aðilum á internetinu og beina viðskiptum sínum beint til flugfélaganna eða annarra þekktra viðskiptaaðila," segir að lokum.